31-nji maýda Türkmenistanyň paýtagtynda üstünlikli geçen «Parahatçylyk we ynanyşmak marafony» Ýewropa Bileleşiginiň Türkmenistandaky wekilhanasy, Türkmenistanyň Bedenterbiýe we sport baradaky döwlet komiteti hem-de Aşgabat şäheriniň häkimligi tarapyndan 2025-nji ýylyň Ýewropa güni mynasybetli guraldy. Köpçülikleýin sport çäresine 517 adam gatnaşdy.
Ýaryş Garaşsyzlyk seýilgähiniň daş-töwereginden ylgamak bilen geçirildi. Ol irden sagat 07:00-dan 11:00-a çenli dowam etdi. Ylgawyň başlanýan we tamamlanýan nokady Türkmenbaşy şaýoly bilen 10 ýyl Abadançylyk köçesiniň kesişýän ýerinde ýerleşdi.
Guramaçylar dürli ýaş toparlary üçin üç tapgyrly aralygy göz öňünde tutdylar: 2 km aralyga ylgaw 16 ýaşa çenli çagalar üçin niýetlenip, ol ýanlarynda uly ýaşlylaryň bolmagynda geçirildi, 5 km we 10 km aralykdaky ylgawlar bolsa 16 ýaşdan uly gatnaşyjylar üçin guraldy.
Sport çäresine gatnaşyjylar üçin zerur infrastruktura döredildi: çagalar üçin ýörite naharlanyş zolagy, 5 km we 10 km aralyga ylgaýanlar üçin suw içmek nokatlary we gök-miwe önümleri bilen iýmitlenmek meýdançalary guraldy.
Ýeňijiler we çäre işjeň gatnaşanlar baýraklar hem-de ýadygärlik sowgatlary bilen sylaglandylar. Çäräniň maksatnamasynda şadyýan ýaryşlar we sport bäsleşikleri hem göz öňünde tutuldy, olar baýrama aýratyn şowhun çaýyp, ajaýyp gurşaw bilen doldurdy.
