Osakada geçirilýän EKSPO-2025 Bütindünýä sergisine gelýänler sosial ulgamlarda Türkmenistanyň pawilýonynyň suratlaryny we täsirlerini uly gyzyklanma bilen paýlaşýarlar. Bu pawilýon eýýäm serginiň meşhur ýerleriniň birine öwrüldi.
Dünýäniň dürli ýurtlaryndan gelen myhmanlar üç gatly pawilýonda görkezilýän türkmen halkynyň baý medeni mirasy bilen içgin tanyşýarlar.
Türkmenleriň adaty gülýaka şaý bezeginden ylham alnyp, ýeňil üçburçluk gümmez görnüşinde ýerine ýetirilen binagärlik çözgüdi bu ýere gelýän jahankeşdelerde aýratyn gyzyklanma döredýär. Garagum çölüniň gözelligini şöhlelendirýän daşky görnüşi özboluşlylygy we milliligi bilen tapawutlanýar.
Pawilýonyň birinji gatynda bu ýere gelýänler şar görnüşli ekranlaryň we immersion tehnologiýalaryň kömegi bilen Türkmenistana wirtual syýahat edýärler. Bu ýerde bolýan syýahatçylaryň köpüsi ýurduň häzirki zaman gazananlaryny görkezýän innowasion akylly şäher Arkadaga bagyşlanan täsirli tanyşdyryş wideofilmini belleýärler.
Ikinji gat myhmanlary Türkmenistanyň energetika, senagat, saglygy goraýyş we bilim ulgamlaryndaky gazananlary bilen tanyşdyrýar.
Türkmenistanyň lukmançylygynda adaty ulanylýan dermanlyk ösümlikleriň ekspozisiýasyna hem uly üns berilýär.
Üçünji gatda syýahatçylar meşhur türkmen halylaryny, milli keşdeleri we muzeý eksponatlarynyň ýygyndylaryny höwes bilen surata düşürýärler. Jahankeşdeleriň köpüsi ýakymly gök çaýy we milli tagamlary hödürleýän adaty türkmen saçagynyň başynda açyk tälerdäki suratlaryny sosial ulgamlarda paýlaşýarlar.
EKSPO-2025 Bütindünýä sergisi 13-nji aprelde Ýaponiýanyň Osaka prefekturasyndaky Ýumesima emeli adasynda açylyp, ol 13-nji oktýabra çenli dowam eder. Bütindünýä serginiň işine 158 ýurt we sebit, şeýle-de ýedi halkara guramasy gatnaşýar. Sergide Türkmenistanyň milli güni 14-nji aprelde bellenip geçildi.
