Türkmen halkynyň Milli Lideri Gurbanguly Berdimuhamedow Arkadag şäheriniň ikinji tapgyrynda guruljak binalaryň taslamalary bilen tanyşdy we Monakonyň Şazadasynyň geňeşçisi bilen duşuşyk geçirdi, Türkmenistanyň Prezidenti BMG-niň Baş sekretaryny doglan güni bilen gutlady we beýleki habarlar
Türkmenistanda
1. Türkmenistanyň Halk Maslahatynyň Başlygy Gurbanguly Berdimuhamedow Arkadag şäheriniň ikinji tapgyrynda gurulýan medeni-durmuş maksatly desgalaryň şekil taslamalary bilen tanyşdy. Saparyň dowamynda türkmen halkynyň Milli Lideri şäher seýilgähiniň, çagalar dynç alyş seýilgähiniň, metjidiň we «akylly şäher» konsepsiýasynyň çäklerinde gurulýan beýleki desgalaryň şekil taslamalaryny gözden geçirdi.
2. Türkmenistanyň Halk Maslahatynyň Başlygy Gurbanguly Berdimuhamedow Monakonyň Şazadasynyň geňeşçisi, Parahatçylyk we sport guramasynyň prezidenti we esaslandyryjysy Žoel Buzu bilen duşuşdy. Söhbetdeşligiň dowamynda Žoel Buzu Monakonyň Şazadasy Alber II-niň we Şagyzy Stefaniýanyň mähirli salamyny ýetirip, Monako Knýazlygynda Türkmenistanyň hemişelik Bitaraplyk hukuk ýagdaýyna esaslanýan parahatçylyk döredijilikli daşary syýasatyna ýokary baha berilýändigini aýratyn belledi. Taraplar ikitaraplaýyn gatnaşyklary has-da pugtalandyrmagyň möhümdigini nygtadylar.
3. Türkmenistanyň Prezidenti Serdar Berdimuhamedow Birleşen Milletler Guramasynyň Baş sekretary Antoniu Guterrişe doglan güni mynasybetli tüýs ýürekden gutlaglaryny we iň gowy arzuwlaryny iberdi. Döwlet Baştutany BMG-niň Baş sekretaryna tüýs ýürekden berk jan saglyk, bagtyýarlyk, egsilmez güýç-kuwwat, alyp barýan işinde uly üstünlikleri arzuw etdi.
4. Türkmenistan ykdysadyýeti dekarbonizasiýalaşdyrmak maksatnamasynyň durmuşa geçirilmeginiň çäklerinde ulaglaryň elektrikleşdirilmegini işjeň ilerledýär. Bu barada Türkmenistanyň maliýe we ykdysadyýet ministriniň orunbasary Babanyýaz Ýallakow Arkadag şäherinde geçirilen Ykdysady Hyzmatdaşlyk Guramasynyň (YHG) durnukly ösüş boýunça ministrler derejesindäki birinji forumynda eden çykyşynda belledi. «Täze Arkadag şäherinde jemgyýetçilik elektrobuslarynyň we elektromobil taksileriň üstünlikli ornaşdyrylmagy elektrikleşdirme maksatnamasynyň netijeli durmuşa geçirilýändiginiň aýdyň mysalydyr. Şol bir wagtyň özünde, zarýad beriş infrastrukturasy ösdürilýär we elektrikli ulaglaryň ulanyjylary üçin elýeterliligi üpjün edilýär» diýip, Ýallakow belledi.
5. Belarusyň köpugurly haryt biržasy (BKHB) Türkmenistan bilen hyzmatdaşlygy işjeňleşdirmäge we birža söwdalary üçin harytlaryň görnüşlerini artdyrmaga gyzyklanma bildiýär. Bu barada Aşgabatda geçirilýän «ITSE 2025» atly halkara sergisiniň çäklerinde BKHB-niň müdiriýetiniň başlygynyň kömekçisi Ýaroslaw Kowalçuk mälim etdi. Onuň bellemegine görä, Belarusyň köpugurly haryt biržasy «belarus bazaryna girmegiň bitewi penjiresi» bolmak bilen, ondan ýurduň ähli döwlet kärhanalary geçýär. «Haryt biržamyza girmek bilen, türkmen kärhanalary ähli bahalar we eltip bermek şertleri bilen tutuş bazarymyza girip bilerler» diýip, biržanyň wekili belledi.
Dünýäde
1. Nepalyň häkimiýeti dünýäniň iň beýik depesi bolan Ewereste (8849 m) çykmagyň täze düzgünlerini işläp düzýär. Indi diňe 7000 metr beýiklikdäki iň bolmanda bir Gimalaý depesine çykmak tejribesi bolan alpinistler daga çykmak üçin rugsatnama alyp bilerler. Bu karar Nepalyň häkimiýeti aşa köp, şol sanda ýeterlik taýýarlygy bolmadyk adamlara hem rugsatnama bermekde tankytlanandan soň kabul edildi.
https://turkmenportal.com/blog/90521/na-everest-planiruyut-puskat-tolko-opytnyh-alpinistov
2. Rak keselini bejermegiň täze usuly Detroýtdaky Uilýam Bomont adyndaky «Corewell Health» lukmançylyk merkeziniň hünärmenleri tarapyndan üstünlikli ulanyldy. Amerikaly alymlar ilkinji gezek proton duga tehnologiýasyny agressiw çişe garşy göreşmek üçin ulandylar we minimal zyýanly täsir bilen oňyn netijeleri gazandylar.
https://turkmenportal.com/blog/90514/v-ssha-vpervye-vylechili-cheloveka-ot-raka-protonnoi-dugoi
Sport täzelikleri
1. Türkmenistanyň basketbol boýunça ýaşlar ýygyndysy (U17) Özbegistanyň Namangan şäherinde tamamlanan «GOLDEN VALLEY CUP 2025» halkara ýaryşynda bürünç medala mynasyp boldy. Üçünji ýer üçin geçirilen aýgytly duşuşykda türkmen türgenleri Gazagystanyň ýygyndysyny 60:57 hasaby bilen ýeňdiler. Bäsleşige Merkezi Aziýanyň bäş ýurdundan 10 topar gatnaşdy.
2. Türkmenistanyň wekili Oguljan Ruslanowa dzýudo boýunça «Berlin Millennium Team Cadet European Cup 2025» ýaryşynda 70 kilograma çenli agram derejesinde bürünç medal gazandy. Bäsleşige 16 ýurtdan 39 türgen gatnaşdy. 16 ýaşly türkmen dzýudoçysy münbere barýan ýolda dört ýeňiş gazandy, iki gezek Germaniýanyň wekillerini we bir gezek Lýuksemburgyň hem-de Latwiýanyň türgenlerini ýeňdi.
